Fytyrat ballkanike/ Shekulli

Dilema
Evropa ka frikë nga një radikalizëm në Serbi, kështu përligjë ajo shtyrjen e shpalljes së pavarësisë së Kosovës.
Në zgjedhjet e reja nuk mund të fitojë askush që është më radikal se Koshtunica.
Ai deri sot ka treguar se mendon si Millosheviçi, por kanë një dallim: të parit i mungon viçi në fund.

Mafia
Politikanët deklarojnë pasuritë e tyre dhe ne habitemi. Në Ballkan kemi politikan të pasur dhe mafioz të varfër. Apo mafioz të pasur e politikan të mjerë! Në emër të barazisë qytetare duhet të detyrohen edhe mafiozët ta bëjnë deklarimin e pasurive, si kolegët e tyre: politikanët! Edhe të korruptuarit duhet t´i deklarojnë rendimentet e tyre që i kanë fituar nga zyra e shtetit, pa paguar qira!

Pafytyrësia 1
“Pas mbarimit të luftës u kthyen në Kosovë shumë më shumë shqiptarë se sa që kishin ikur. Ata erdhën nga Maqedonia dhe Shqipëria në Kosovë, por për kthimin e serbeve nuk është bërë asgjë” Koshtunica për kanalin televiziv te Moskës: TVC.
E vërteta e parë: Ai pengon kthimin e serbeve! E dyta: shqiptarët nuk kishin ikur, ishin deportuar dhe dëbuar! E treta: shqiptarë nuk kanë ardhur nga Shqipëria dhe Maqedonia, por kanë ardhur nuse në Kosovë dhe kanë shkuar nuse nga Kosova!

Pafytrësia 2
“NATO donë të krijojë shtet të ri në territorin e Kosovës me kryeqytet bazën amerikane Bondsteel...”, tha Koshtunica për kanalin televiziv rus. Rrenë. NATO garanton sigurinë e shtetit të ri. Shteti është ndërtuar para NATO-s. Rrena 2. Kryeqytet do të jetë Prishtina.

Fytyra serbe
Nëse Kosova bëhet e pavarur poshtërohet fytyra serbe, përsërisin ata që nuk kanë fytyrë dhe që përpiqen të poshtërojnë fytyrën shqiptare dhe amerikane dhe evropiane.

Përralla serbo-ruse
Nëse Kosova bëhet e pavarur, atëherë shumë regjione separatiste në botë do të shpallin pavarësinë.
Kështu ndodhi kur u be Republika Sërpska në Bosnjë. Bota u rras me republika të reja. Tash ato do të bëhen shtete.
Ne, në fakt kemi shpallur shumë herë republikën, por ajo nuk u bë kurrë. Shpallja nuk ndryshon shumë, por forca. Kush ka kaçik, le të bëhet shtet! Kush nuk ka, mbetet gjysmagjel. Ky është ligj i Tokës. Lamtumirë Serbi. Mirupafshim në Evropë!