Tradhtia bashkëshortore

Shën Pjetri dhe shefi (zoti) marrin një vendim që në të ardhmen, të pranojnë vetëm raste që kanë vdekur nga një vdekje e çuditshme. Të zakonshmet, jo. Disa minuta më vonë, dikush troket në derë.

»Vetëm raste të jashtëzakonshme«, thotë Shën Pjetri.

»Dëgjoni ngjarjen time ju lutem», këmbëngulë i vdekuri.

Shën Pjetri tundë kokën në shenjë pajtimi.

»Unë gjithmonë pata dyshuar në besnikërinë e bashkëshortes sime, prandaj  u ktheva befasisht dhe me qëllim disa orë më herët nga puna. Kisha një parandjenjë se po ndodhte diçka. Parkova makinën, vrapova si i çartur shkallëve të shtatë kateve dhe arrita lart pa frymë. Hapa derën e banesës duke e përplasur, hallakata si i çmendur  dhe nuk gjeta njeri. Dola në ballkon me shpejtësi dhe ja, aty gjeta të varur një djalosh në pamark. Si i tërbuar nxitova dhe mora një çekiç, e godita bastardin në gishta dhe ai rrëshqiti poshtë, por pat fat. Derri u përplasë mbi kaçube dhe u ngrit. Unë vrapova në kuzhinë i tmerruar, marrë frigoriferin dhe e hedh nga ballkoni: E qëllova! Pasi derri u bë petë nga frigoriferi, unë përjetova një goditje në zemër dhe vdiqa nga infarkti!«

»Në rregull«, tha Shën Pjetri, »të lejohet, eja brenda...»

Disa çaste më vonë, ja edhe trokitja tjetër.

»Vetëm raste të jashtëzakonshme «, tha përsëri Shën Pjetri duke hapur pakëz derën.

»Oh, nuk ka problem, e jashtëzakonshme, sa s’ bëhet më!», ia ktheu i vdekuri.

»Po!«, shton Shën Pjetri.

»Unë çdo mëngjes bëj fizkulturë në ballkon, gjatë kërcimit, shkela një top me dy këmbë, humba drejtpeshimin dhe rashë nga ballkoni, por, në sekondën e fundit, arrita të kapem në parmakun e ballkonit më poshtë. ’O Zot’, thash me vet me vete, ’mrekulli, çfarë fati, po jetoj akoma’. Disa sekonda më vonë, u shfaq një idiot  dhe më goditi me çekiç në gishta. Unë rrëshqita dhe rash mbi kaçube. Aty përsëri thash me vete: ’O Zot, shpëtova për herë të dytë. Mrekulli!’ I çuditur  ngrita kokën për të parë lartësinë nga kisha rënë dhe mu në atë çast, më qëlloi një dreq frigorifer ...«

»Ok«, thotë Shën Pjetri, "eja brenda."

Dhe ja përsëri trokitja tjetër në derë.

»Vetëm raste të jashtëzakonshme«, thotë Shën Pjetri.

»Pa dyshim!«, thotë i vdekuri.

»Vazhdo!« shtoi shën Pjetri.

»Pas një seksi të mrekullueshëm  dhe me plot kënaqësi, i trishtuar nga zhurma në banesë,  ika lakuriq dhe u fsheha  në frigorifer...

nga gjermanishtja përktheu dhe përshtati Lis Bukuroca