Qeni i Pavllovit, Gazeta DITA

Ka disa muaj që në twitter përcjell shkrepjet mendore të Hugo Chavez-it. Edhe të Fidel Castros. Nuk e bëj këtë pse më ka marrë malli për relikte dhe postulate komuniste, por mendimet e tyre krahasoja me mendimet kryesisht të Berishës, por edhe të Hashimit dhe politikanëve tjerë shqiptarë. Kjo metodë krahasimtare ndihmon në zbërthimin e demagogjive dhe për çudi, ka një përputhje permanente, bipolare në të gjykuar, në veprime dhe kryesisht shquhet dhe njësohen dhe është tepër i dukshëm pasioni i zjarrtë, i sëmurë  për mbetjen në karrige: edhe atë, sikur t’ ishin vëllezër. Mund të konstatohet një diferencë sintaksore, por jo semantike dhe sugjestionuese. Ata përtej oqeanit kanë ngelur të majtë, këta tanët janë konvertuar në të djathtë dhe kanë braktisur katundarinë dhe emancipimin, ndriçimin e saj me materializmin dialektik.

Kur Saliu apo Hashimi flasin për ngjarje të rëndësishme për karriget e tyre, shprehen si edhe Chavez:" „Escribiremos otra página histórica...." Pra, do të shkruajmë një faqe tjetër të historisë. Kur Berisha dhe Thaçi thërrasin me parulla revolucionare për përkrahje apo zgjedhje, e bëjnë me ato fjalë si edhe Chavez apo Fidel Castro në twitter :"Vamos Pueblo Bueno...Todos y todas A VOTAR!" Edhe pse ngjashmëritë janë frapante, përsëri është e gabueshme të quhen tanët diktatorë. Nuk janë. Tanët janë despot tipik lindor që do të vdesin të kapur për këmbët e karriges. Si Gadafi, si Mubaraku e despotët tjerë. Këtyre nuk ju duhet monarkia e diktatura për të mbetur në pushtet, ata dinë të vjedhin vota dhe në idiokraci, kjo zgjuarsi, garanton mbijetesën politike deri në kiamet.

Tartufët dhe populistët kanë një aftësi të theksuar për të kuptuar se çfarë dëshiron të dëgjojë populli dhe i flasin pikërisht dëshirave të tij, mungesave të tij dhe iuluzioneve. Edhe Chavez, edhe Castro, edhe Saliu edhe Hashimi trajtojnë popullin si Pavllovi qenin e vet. U nevojitet për eksperimente dhe për ta kuptuar psikologjinë e masës, teket e saja. Për t’ i realizuar përfitimet e veta. Zilja vihet në përdorim para zgjedhjeve. Pasojnë shpërblimet. Pas çdo shpërblimi regjistrohen reaksionet, tajitjet dhe tundja e bishtit. Pas përsëritjeve, qeni gëzohet edhe pa shpëblim, vetëm me tingullin e ziles. Zakonisht, demagogëve dhe palaçove, pak para zgjedhjeve, u bie ndërmend edhe patriotizmi, edhe vendet e punës edhe historia, por vetëm në ato fragmente që u konvenon atyre.

Si edhe Chavezi në twitter, ”Hasta la Victoria” shkruan gati çdo ditë edhe ”Rilindja Demokratike”  e Berishës. Ajo din se Berisha do t'i fitojë zgjedhjet dhe din sigurisht edhe përqindjen e fitores. Madje, ajo gazetë shkruan se opozita nuk do ta pranojë humbjen, sepse ata e dinë se do të fitojnë. Si tek Chavez dhe tek Castro, edhe tek Berisha dhe Thaçi, gjykatat ekzistojnë për të dëshmuar dhe certifikuar pafajësinë e kriminelëve dhe mafiozëve të dëshmuar brenda partisë dhe shtetit.

Chavez kishte në twitter 4.162.387 ndjekës, pas vdekjes iu shtua edhe një kortezh me 44.355 veta dhe u bënë 4.206.742. Nën emrin e tij shkruan “Presidente de la República Bolivariana de Venezuela. Soldado (ushtar) Bolivariano, Socialista y Antiimperialista.” Herë pas here i falenderohej edhe Raulit dhe Castros. “Gracias a Fidel, a Raúl y a toda Cuba!! Gracias a Venezuela por tanto amor!!!”

Në vjeshtën e kaluar, para zgjedhjeve kërkonte Chavez bashkimin e patriotëve “... unidad de todos los Patriotas... “, sepse vetë kështu do të fitoheshin zgjedhjet, dhe mos harroni, fitohen duke bashkuar të gjithë atdhetarët, ata që nuk i bashkohen, sugjestionimi është ky: ata nuk janë atdhetarë, ata janë tradhtarë. Ju kujtohet mendimi i Berishës se disa janë lindur pa identitet nacional. Me sugjestionime të tilla vokabulari i Thacit dhe Berishës është përplot. Ka qindra lidhje tjera tepelatike në mes politikanëve tanë dhe atyre që sundojnë klasën punëtore në Amerikën Latine.

Në tetor Chavez falenderoi të gjithë për fjalët e mira, për ndjenjat: “Gracias a todos los amigos y amigas del mundo por sus palabras y sus sentimientos de amor hacia Venezuela!!! Gracias!!!”

Pas vdekjes miku i tij Castro shkroi në twitter se ai ka ikur fizikisht, por vepra e tij është e pavdekshme dhe do të  mbijetojë. “Hugo Chávez se nos ha ido físicamente pero sus ideas, su obra, su legado es inmortal”. Me iluzione të tilla kanë braktisur jetën të gjithë diktatorët. Profesori dhe doktori dhe kardiologu (siç e quajnë fansat e tij) din se idetë e tija nuk do të mbijetojnë për shkak të mutacioneve të shpeshta, transvestizmit, prandaj nuk ka shpresa të tilla, por ka lënë një slogan, një dëshirë kobzeze: “Pas meje, u bëftë kiameti!”

Qindra analistë shqiptarë ndriçojnë politikën, synimet makiaveliste të Berishës. Ai është politikani më i skanuar, më i zbërthyer dhe më i analizuar, por edhe mijëra intelektual tjerë, gazetarë e analistë, nuk do të jenë në gjendje ta parashikojnë se si do të reagojë pas humbjes së zgjedhjeve. Amerika dhe Gjermania i bënë të qartë se vjedhje nuk do t’ i pranojnë më. Në qershor ai do t’ i shokojë të gjithë me mënyrën se si do t’ i kontestojë zgjedhjet. Kjo dihet, por nuk dihet akoma mënyra se si.

Mendimi i fundit i Chavez  ishte më 18 shkurt 2013 dhe shkroi: ”Sigo aferrado a Cristo y confiado en mis médicos y enfermeras. Hasta la victoria siempre!! Viviremos y venceremos!!! ” Pra shpresat e fundit i kishte tek Krishti, besimin tek mjekët dhe infermieret dhe shpresonte se do të shërohet dhe do të fitojë, por i mbylli sytë dhe iku. Buenas noches Patria Buena! Berisha para se t‘ i mbyllë sytë do të pëshpërisë: “Natën e mirë Shqipëri e bukur dhe naive. Duke menduar se po votoje një demokrat, votoje anëtarin e Partisë së Punës, mikun e xhaxhit...

Gazeta Dita