Zgjedhje në tre lande të Gjermanisë

Sot mbahen zgjedhje në tre lande të Gjermanisë. Gjermania ka 16 lande, Bundeländer, me 16 kryeqytete. Landet mund të krahasohen me shtetet amerikane, ose kantonet e Zvicrës, prandaj quhet edhe Republika Federale e Gjermanisë. Tre prej tyre janë shtete-qytete, Stadtstaaten: si Berlini, Hamburgu dhe Bremeni.

Sot mbahen zgjedhjet në Renani - Palatinat, emërtim nga italishtja (Rheinland-Pfalz), Baden Wyrtenberg (Baden-Württemberg) dhe Saksoni Anhalt (Sachsen-Anhalt), ky i fundit land i ish Gjermanisë Lindore.

Druhet se do të fitojë deri në 18 për qind AfD. Alternativa për Gjermaninë e zonjës Frauke Petry. Nëse arrin tek ai numër, atëherë mund të vështirësohet krijimi i koalicioneve në lande, sepse partitë e mëdha, akuzojnë atë për qëndrime radikale kundër të huajve dhe refuzojnë të bëjnë koalicion me AfD.

Në kongresin e vet që do ta ketë partia, dëshiron të shqyrtojë mundësinë e ndalimit të synetit, çfarë dje alarmoi myslimanët dhe hebrenjtë. Partia ka arritur këtë përqindje me deklaratat e saja kundër refugjatëve, posaçërisht kundër myslimanëve. Para disa ditëve pat kërkuar edhe përdorimin e armëve për të ndaluar hyrjen e refugjatëve. Në parti flitet hapur kundër myslimanëve, homoseksualëve dhe radikalëve ekstrem. Duket se gradualisht po pozicionohet dhe njësohet me ideologjinë e Donald Trumpit.

Zonja Merkel dje deklaroi se refugjatët në kufirin maqedonas, mund të vendosen në Greqi dhe se ata që kanë ardhur, jo se kanë mundësi të integrohen, por e kanë për detyrë. Ky mendim i saj u klasifikua nga media gjermane si ndryshim në qëndrimet e saj, që qe kundërshtuar edhe nga partia, ministra dhe kryesisht partia motër e Bavarisë CSU.

Provokimet seksuale në Keln, si dhe lëndimet në natën e Vitit të Ri, ku pasuan më shumë se 1000 kallëzime penale nga vajza gjermane, më shumë se 500 prej atyre denoncime për provokim seksual, ndihmuan AfD dhe çdo vepër penale e refugjatëve, ndikon në rritjen e asaj partie. Ngjarjet e Vitit të Ri, ndikuan edhe në ndryshimin e ligjit dhe mundësinë për t'i kthyer kriminelët në vendin e vet.

Sot, pra, në këto tre lande nuk do të ketë thjesht zgjedhje, por do të votohet edhe për apo kundër politikës së deritashme të kancelares Merkel.