Alegoria e shigjetës së dytë

1.

– "Mësues, pse vuajmë kaq shumë në jetë?“, pyeti një dishepull Budën.

– "Mendo në një njeri që qëllohet nga një shigjetë. Kjo është një dhimbje e madhe, apo jo?"

– "Po, mësues," tha dishepulli.

– "Por tani imagjino që një shigjetë e dytë e qëllon atë njeri pikërisht në të njëjtin vend. Çfarë ndodh?“, pyeti Buda.

– "Ai do të vuajë edhe më shumë.“, tha dishepulli.

Buda buzëqeshi dhe shtoi:

„Kjo është pikërisht ajo që bëjmë me veten. Shigjeta e parë është dhimbja fizike ose emocionale që nuk mund ta shmangim – një ndarje, një humbje, një sëmundje. Por shigjeta e dytë është mënyra se si reagojmë ndaj saj – ankthi, frika, zemërimi dhe mendimet negative që shtojmë mbi dhimbjen e parë. Shpesh, është shigjeta e dytë ajo që shkakton vuajtjen më të madhe.“

Nga gjermanishtja LB

Pra, shigjeta e parë simbolizon një ngjarje që na ndodh befasisht. Ajo është jashtë kontrollit tonë; thjesht "ndodh". Shigjeta e dytë simbolizon emocionet që kjo ngjarje ngjall në ne – si zemërim, trishtim, urrejtje apo frustrim. Por e dyta duhet të jetë plotësisht nën kontrollin tënd. Ti duhet të kesh fuqinë për të zgjedhur mënyrën e reagimit: i qetë, me vetëdije dhe pa emocione të forta. Nëse reagohet ashpër, pa vetëdije dhe pa kontroll, goditja e dytë, shigjeta e dytë i ngulet i vetvetes. Këtë e thotë Buda: "Shpesh, është shigjeta e dytë ajo që shkakton vuajtjen më të madhe.“ Mos e godit vetveten!

2.

Një herë, një grua i kërkoi Budës që t’i kthente në jetë djalin e saj të vdekur. 

"Shko dhe më sill një farë sinapi nga një shtëpi ku nuk ka pasur kurrë dhimbje.", i tha Buda asaj.

Ajo nxitoi nga një shtëpi te tjetra, por kudo gjente njerëz që kishin humbur ndonjë të dashur. 

Pas një kohe, ajo u kthye tek Buda dhe i tha:

"E kuptova. Dhimbja është pjesë e jetës.", dhe u nis drejt shtëpisë së vet.

Nga gjermanishtja LB

3.

Një ditë, kur skllavi i Diogjenit, Manesi, kishte ikur, 

një njeri e pyet:

"Diogjen, të kishte ikur skllavi Manesi?"

"Ah, po, ka ikur!" ia ktheu Diogjeni.

"A nuk po e kërkon?" - vazhdoi ai me pyetjen tjetër.

"Nëse Manesi mund të jetojë pa Diogjenin, 

atëherë edhe Diogjeni mund të jetojë pa Manesin," -

i thotë Diogjeni në fund dhe vazhdon rrugën...

Nga gjermanishtja LB

Ps.

Nëse ai nuk mund të jetojë pa skllavin, atëherë do t'ishte skllav i skllavit. Diogjeni ishte i lirë, prandaj nuk e kërkon...Kur largohet dikush prej nesh, na ndihmon kjo anekdotë për ta përballuar çastin. Nëse dikush mund të jetojë pa mua, edhe unë mundem pa të...