Stigmatizimi

Naser Aliu

Stigmatizimi

E zura një shqiptar me presh në dorë
e vështrova qortueshëm në sy
dhe, e pështyva mu në lule të ballit

Xhamin e fshiu pastruesja
mua m´u derdh vepra e tij ndërmjet mrrolave
dhe, me të endem poshtë e lartë nëpër botë!


Oborret shqiptare

Dikur Shqipëria lëngonte nga amnezia kronike
me vite hëngri vetveten
dhe, gëlltiti pelinin e gjysmës tjetër

Sot Shqipëria dhe Kosova vuajnë nga skizofrenia
lëpijnë këpucët e huaja
dhe flasin përçart...


Sugjestionimi
Faber est suae quisque fortunae

Shteti më i ri në botë
përsërisin
sa herë zihen pisk
Thua se është zogëzshtet,
qepëenjomështet
apo qengjshtet
Thua se jemi foshnjështet, udhëhequr nga një dyvjeçar!

Në të vërtet,
hëngrëm kohën
përtypëm e kapërdimë histori
Për kafjall
Për drekë
Për darkë
Dhe jemi dergjur si Gjergj Elez Alia!

Jo lindje e re
lindje e korrigjuar
jemi
vetëm pas ndreqjes tonë

E vërteta duhet thënë fëmijëve
kështu,
ndoshta përpiqen ta ruajnë New born – in si duhet
me përmirësime të reja...
Ndryshe
ndryshe mbetet shtet i retarduar!


1 Maji

Njerëzit u rralluan rrugës, pak këmbësorë
Qyteti trishtueshëm i zbrazët me pak diell
Aty këtu ndonjë plakë me bastun në dorë
Pranverë e freskët, ndonjë vranësirë në qiell

Punëtorët pushojnë në shtëpitë e tyre sot
Punëdhënësit disa ditë më parë shtegtuan
Drejt vendeve të ngrohta si për çdo mot
Për kremtimin e 1 Majit në Kubë shkuan