Arroganca e qeverisë serbe

Naser Aliu



Kufomat shqiptare
Ata pohojnë dhe përsërisin se janë demokrat dhe se nuk vazhdojnë me politikën e Millosheviçit. Po si qëndron e vërteta ?
Ish-qeveria serbe (sot në Hagë) masakroi kombet në ish- Jugosllavi. Ata vranë edhe shqiptarë dhe kufomat e tyre u vodhën dhe u varrosën nëpër Serbi. Këto vrasje i bëri ish-regjimi nga i cili dëshirojnë rrejshëm të distancohen. Ata e kanë gojën plot dhe nuk ndalen ta shajnë Millosheviçin, por po këta ruajnë vjedhjet e tija, madje ata ruajnë dhe nuk i dorëzojnë edhe trupat e pajetë. Ata thonë se janë bërë demokrat, por edhe 7 vjet pas lufte mbi tre mije shqiptarë janë të varrosur nëpër Serbi. Ne tani, këto kufoma i kërkojmë gjoja nga demokratët serb, dhe këta që mendojnë se janë demokrat, dhe se nuk përqafojnë politikën e Kasapit të Ballkanit, nuk na i dorëzojnë neve. Pra Koshtunica dhe Tadiçi qenka demokrat, por trashëgiminë e Millosheviçit e përvetësojnë dhe e konsiderojnë të veten dhe nuk ndryshojnë qëndrimin ndaj viktimës.
Nëse Serbia qenka demokratike, pse keqpërdorë kufomat e njerëzve të pafajshëm?

Pasaportat serbe
Klasa e “re” politike në Serbi nuk ndalet të pohojë se janë demokrat, por kjo klasë politike nuk i dorëzon Kosovës arkivat dhe dokumentet e vjedhura në Kosovë. Kjo klasë politike kudo nëpër botë deklaron të jetë demokratike, por kjo klasë politike mban dokumentacionin e Kosovës nëpër Serbi dhe kështu lëshon pasaporta dhe dokumente për shtetësi, edhe pse Kosova zyrtarisht nuk është nën administratën serbe, por të Kombeve të Bashkuara. Pra këta demokrat serb, që në kohën e Milosheviçit vinin emblema në gjoks, si shenjë dalluese për tu qëlluara nga NATO, solidarizoheshin me Millosheviçin, sot mendojnë se janë demokrat, shesin mend për demokracinë, por trajtojnë me respekt të madh piraterinë e Millosheviçit. Me pasaporta, certifikata të datëlindjes, të kurorëzimit që lëshojnë ata, janë duke u fituar miliona Euro në Serbi.
Nëse Serbia qenka bërë demokratike pse bën kontrabandë të tillë?

Shpërfillja e superfuqive
Amerika dhe Evropa pa pra kërkojnë dorëzimin e kriminelëve, apo më objektivisht të dyshuarve për gjenocid dhe krime ndaj njerëzimit. Serbia, më drejt Koshtunica dhe Tadiç, tërheqin për hunde Perëndimin dhe vazhdimisht u premtojnë dhe vazhdimisht shpresojnë se një ditë Perëndimi do të pushojë me ndjekjen e tyre. Ata shpresojnë kështu sepse për ta njerëzit që po ndiqen nga Perëndimi, janë hero të Serbisë. Këta kriminel merrnin pension nga qeveria e Millosheviçit, adresa i dihej, dhe tani para dy muajve u konstatua se pensioni i dërgohej në Beograd në një bankë edhe nga kjo qeveri, e cila thotë se nuk është si Millosheviçi dhe e cila pohon se nuk dinë se ku banojnë dy kryekriminelët e Evropës.
Meqenëse Serbia paska qeveri demokratike, pse kjo qeveri nuk dorëzon kriminelët?
Një qeveri vërtetë demokratike në Serbi do t´ishte fatbardhësi jo vetëm për Kosovën dhe regjionin, por pikësëpari për Serbinë.

U botua ne:
Gazeten Shqiptare