Ç’është jeta? Erich Fried

Erich Fried
1921 – 1988


Ç’është jeta?

Jetë
është ngrohtësia
e ujit në banjën time

Jetë
është goja ime
në prehrin tënd të hapur

Jetë
është zemërimi
kundër padrejtësive në vendet tona

Ngrohtësia e ujit
nuk mjafton
unë duhet edhe të pllaquritem brenda

Goja ime në prehrin tënd
nuk mjafton
unë duhet edhe ta puthi atë

Zemërimi kundër padrejtësisë
nuk mjafton
Ne duhet edhe ta ftillojmë atë

dhe
të bëjmë diçka kundër saj
Kjo është jeta


Mbi lirinë e brendshme

U përkula
për t’i puthur çizmet
e shndritshme
të zeza
Zotit tonë
aty tha ai:
Më poshtë!

Kur u përkula dhe më thellë
ndjeva në vete
madhërishëm
kundërshtimin
e kurrizit
që nuk donte të kërrusej

I gëzuar u zvarrita tutje
falënderues ndaj Zotit tonë
për këtë përjetim
dinjitetit
dhe forcës
time të brendshme


Në kryeqytet

»Kush sundon këtu?«
pyeta unë
Ata thanë:
»Populli, natyrisht»

Unë thash:
»Natyrisht populli
mirëpo kush
sundon përnjëmend?«

Nga gjermanishtja
Lis Bukuroca