Shënim, gazeta DITA

Pyetje nga kryeredaktori i gazetës Dita Adrian Thano: Pse Berisha nuk pranon 29 Nëntorin:

Mendimi im është se ai nuk kundërshton 29 Nëntorin, por në fakt ai lufton të kaluarën e tij.Qoftë kundër datave historike, qoftë kundër objekteve të ndërtuara gjersa ishte ai në Partinë e Punës, qoftë vendime apo orientime politike. E çdo gjë e krijuar, prodhuar apo zhvilluar gjatë komunizmit, është shenjë me të cilën ai identifikon veten. Ndërgjegja dhe sedra reagojnë ndryshe. Ai ka komplekse të mëdha dhe nëndija vazhdimisht e udhëzon të luftojë të kaluarën e vet.

Ai dëshiron të çrrënjosë çdo gjë që rikujton epokën e sekretarit komunist. Qëndrimi tij është neurotik, pengesa psiqike dhe flasin për një konflikt të brendshëm. Ai ishte hiperaktiv dhe trazovaç gjersa ishte në krye të vendit, i tillë mbetet edhe në opozitë duke luajtur një rol rrënues dhe dëmtues. Ambicja e sëmurë dikton që çdo gjë, çdo ngjarje, çdo lëvizje shoqërore, çdo ngritje apo rënie, duhet të ketë firmën e tij. Ai shkruan skenare, ai bën regjinë dhe ai luan rolin kryesor. I pafat është ai popull që ka një politikan si ai. Berisha duhet injoruar tërësisht, sepse me replika nga Qeveria apo gazetat, ai faktorizohet përsëri. Kur të pushojnë përfillja e tij jashtë, me të do të merret PD dhe çlirohet. Demokracia shqiptare do të fitonte shumë.

Kur një drejtor shkolle, në vend të pensionimit, gjoja nga pasioni për profesionin, bëhet pastrues shkolle, atëherë mund të thuhet se ka probleme të mëdha në rradake. Berisha kaloi nga Kryetar shteti dhe Kryeministër, në deputet! Kjo flet për degradim dhe nuk e ka bërë askush me dy palë mend në kokë. Ky është shembull sui generis, specie e vetme në Europë.

Edhe nëse i plotësohet dëshira me 29 Nëntorin, të nesërmen do të shfaqet me synime të tjera, por të gjitha do të jenë qëndrime që lidhen me post traumatizimin e tij. Ai nuk duron asgjë që i përkujton të kaluarën. Kështu përpiqet ta bind ndërgjegjën e vet dhe ta qetësojë nëndijen duke u munduar për të larë të kaluarën. E si bëhet kjo larje? Duke zhdukur data dhe objekte nga e kaluara…

Gazeta DITA