Propozim për Nderi i Kombit, gazeta SOT

Për të mënjanuar padrejtësitë, mëritë dhe diskriminimin e personaliteteve shqiptare, propozoj të stolisen me këtë titull edhe disa shqiptarë të mëdhenj, institucione, madje edhe ndonjë fshat, që deri tani janë shpërfillur nga autoritetet, që merren me zbukurime dhe teletisje nacionale shqiptare me xhingla.

Nderi i Kombit duhet shpallur edhe:

1. Bujar Nishani. Nishani e meriton. Është njeriu më anonim në historinë e shtetit shqiptar, që arriti të ulet në ulësen e Presidencës. I plotësonte të gjitha kushtet. Ishte i përdorshëm, i përkulshëm dhe me aftësi të posaçme zvarritëse. Para se të zgjidhej nuk ka pasur asnjë vepër me të cilën mund ta dëmtonte apo zbukuronte veten. Është njeriu që e meriton sepse nga anonimiteti absolut, në presidencë, nuk ka ditur dhe nuk ka mundur askush deri më sot të ulet. E meriton pra për shkathtësitë e tija depërtuese dhe profilizuese. Ky e meriton edhe pse i ka mohuar një pozitë një humanisti shqiptar, të cilin as nuk e kupton, e as nuk ka aftësi intelektuale për ta vlerësuar. E meriton sepse arrit ta bëjë Nderi i Kombi në Shqipëri edhe Bexhet Pacollin, edhe pse askush nuk din në Shqipëri, çfarë të mire u ka bërë Pacolli: me çfarë ta kujtojnë dhe me çfarë të mburren për ta shmangur mosmirënjohjen. Ndoshta edhe me këtët titull synohen kapja e tij dhe detyrimi për t' i përfshirë në testamentin e trashëgimit disa politikanë shqiptarë. Ndoshta ky shpërblim iu bë edhe për t' i thënë: ti nuk ke bërë asgjë, por bën diçka në të ardhmen sepse në gazeta serbe, ke gazuar. Nishani meriton të shpallet Nderi i Kombit edhe pse ka rruar mustaqet, e kjo nuk ndodhë shpesh në botën mustaqebartësve.

2. Isa Mustafa. Isa e meriton. E meriton pse ka emrin Isë e jo Maria. E meriton për shkathtësinë dhe aftësinë mbinjerëzore: për fleksibilitetin dhe aftësitë konformiste. Për mbijetesën dhe spërdredhjen duke fituar në rende të ndryshme shoqërore. Për përdorshmërinë, për përshtatshmërinë, për finokërinë, për dinakërinë superiore dhe për profilizimin si i vetmi kryeministër në botën demokratike, me më pak vota se partia e zëvendësit të vet. Ka zhvatur pozitën me premtime që nuk do t' i mbajë, jo me vota. Ky në fakt meriton edhe futjen në librin e Ginisit, sepse ka treguar se në demokraci, nuk duhet shumica për t' u bërë kryeministër. Ky është i vetmi shembull në vendet ku mbahen zgjedhjet e lira. E meriton titullin NDERI I KOMBIT, sepse me pozitën e tij, u dëshmua se çdo rregull ka edhe një përjashtim: nuk fiton shumica gjithmonë në demokraci, por edhe pakica. Kjo thyerje, ky zbulim aplikativ për demokracinë është i barabartë me zbulimin e teorisë së relativitetit.

3. Çmimi Nderi Kombit t' i jepet Sali Berishës. Në fakt e meriton i pari, por gjendet në vendin e tretë, për shkak të pozitës inferiore që ka ndaj dy të parëve. Motivacion nuk duhet shumë, mjafton të përmenden disa vepra: për profilizimin në Partinë Demokratike, pa u përjashtuar apo pa hequr dorë nga anëtarësia në Partinë e Punës. Është i vetmi ish-stalinist në planetin tokë, që sundon një parti demokratike. E meriton për ndërtimin e piramidave më shpejt se Keopsi. Për shembjen e shtetit shqiptar. Për Gërdecin. Për aftësinë për t' i zhdukur si shurra e pulës më shumë se 230 milion euro nga autostrada. Për vrasjen e revizionistëve, që më 21 janar desh morën pushtetin. Për stilolapsat pistoleta të puçistëve. Për aftësinë për ta dirigjuar me shkop dirigjenti, Luli e Vocërr. Për aftësinë për ta shndërruar Kuvendin shqiptar në qenef publik. Për thyerjen e rekordit në not çdo verë. Dhe, arsyeja kryesore: aftësi më të mëdha se Berlusconi për t' i ikur gjykatës dhe për t' u tallur me Kodin Penal të Shqipërisë. Kryesisht kjo aftësi duhet marrë në konsiderim dhe nderuar zotin Sali Berisha me titullin Nderi i Kombit. Pas këtij titulli, le ta votojnë përsëri për kryeministër. E meriton dhe pikë.

4. Lazaratin. Ky fshat e meriton sepse u bë i njohur në planetin tokë me dashurinë për t' ia qetësuar nervat botës së trazuar me kanabis sativa. E meriton sepse ka arritur të bëjnë të heshtin edhe hoxhën, edhe priftin, edhe popin, edhe Sali Berishën dhe të përmbarojë veprimtarinë e vet i papenguar. Ky fshat e meriton sepse është Nderi i Kombit si Corleone për Italinë.

5. Universiteti i Prishtinës. Ky Universitet njihet për numrin e madh të sharlatanëve. Aty shumica e profesorëve nuk e flasin mirë gjuhën amtare. Aty të gjithë dinë për njëri tjetrin dhe heshtin. Aty dinë se kush ka doktoruar me plagjiat, por të gjithë heshtin. Kjo heshtje e madhe kolektive, nuk është lehtë të arrihet në një rend demokratik, prandaj: Nderi Kombit. Nderi i Kombit edhe sepse në arkivat e vet, ka qindra studentë që nuk kanë studiuar kurrë, por kanë diplomuar aty pas vitit

2000. E meriton edhe për suksese të jashtëzakonshme në plagjiaturë.

6. Universiteti Europian i Tiranës. Është një universitet që lufton ksenofobinë me tituj të doktoraturës dhe është i mendimit se kandidatët, nuk duhet të traumatizohen me studime, kur mund të mjaftojnë disa mijëra euro për dy shkronja: “Dr.” Kandidati nuk duhet lodhur me mësimin e gjuhës shqipe e as nuk i duhet navigator për ta gjetur godinën e universitetit, mjaftojnë lekët. Meriton titullin edhe për turistët shkencor dhe afrimin e popujve dhe kulturave.

7. Gjykata Speciale. Kjo gjykatë duhet shpallur Nderi i Kombit në një paketë me Hashim Thaçin.

8. Fakultetin e Shkencave të Aplikuara të Biznesit në Pejë. Ky fakultet e meriton dhe nuk duhet asnjë diskutim. Nga 505 veta të diplomuar, vetëm 3 kanë ndjekur studimet dhe ligjëratat. 502 të tjerë nuk ekzistojnë as në arkiva. Ky fakultet duhet shpallur domosdoshmërish dhe urgjentisht Nderi i Kombit sepse shpejt dhe bukur, ka rritur numrin e intelektualëve në Kosovë, që sot kanë pozita të ndryshme dhe sakrifikohen për atdheun. Ata janë patriot të vërtetë.

9. Autobusët. Nderi i Kombit meriton edhe firma e autobusëve, që me aq shumë mundim, arriti të zvogëlojë papunësinë në Kosovë. Këta autobus meritojnë seriozisht titullin Nderi i Kombit sepse i mundësuan një vizitë në Berlin Hashim Thaçit dhe Skender Hysenit.

10. Prokuroria e Kosovës dhe e Shqipërisë, tok me gjykatat. E meritojnë dhe të mos ndalemi fare tek motivacioni. Nderi i Kombit par excellence.

11. Krundet. Nderi i Kombit duhet shpallur edhe krundet. Nuk është lehtë njeriu të ushqehet me krunde dhe të mburret. Meqenëse krundet arrijnë të ushqejnë popullin, atëherë e meritojnë edhe ato të deklarohen Nderi i Kombit: kanë bashkuar dhe zbutur raportet në mes njeriut dhe kafshës. Kanë rritur mirëkuptimin dhe empatinë e ndërsjellë.

11. Poçavra. Se poçavra, lecka duhet shpallur Nderi i kombit, nuk duhet asnjë arsyetim. E merion dhe pikëçuditje.

Mirëpo, për të qenë sa më objektiv dhe i drejtë, duhet propozuar edhe anulimin e titujve “Nderi i Kombit” këtyre shqiptarëve: Ismail Kadaresë, Dritëro Agollit, Gjergj Fishtës, Fatos Arapit, Azem Shkrelit, Mitrush Kutelit, Martin Camajt, Ali Podrimjes, Eqerem Çabejt dhe të gjithë atyre që nuk kanë lekë sa Pacolli dhe të gjitha ata që nuk janë zënë në plagjiaturë, si Nderi tjetër i Kombit Plagakademiku, Sabri Hamiti. Në një listë Kadare dhe Pacolli, nuk mund të përfshihen, prandaj, të lartëpërmendurit jashtë listës; i shëmtojnë bukurinë dhe xhinglat titullit Nderit i Kombit.

Gazeta SOT