Në çaste vendimtare, duhen vezë!, botasot

Sikur të mos kishte dhënë urdhër Thaçi për deportime, atëherë do të kishte deklaruar: "Institucionet tona relevante do të merren me hetimin dhe do të ndriçohet çdo detaj, se si ka ardhë deri te kidnapimi i mësuesve të djalit tim dhe të fëmijëve tjerë të elitës tonë politike në Kosovë. Brenda 24 orëve do të informoheni! Zero tolerancë me rrënuesit e shtetit ligjor!"

Tash të mendojmë pakëz gjakftohtë: Erdogani sigurisht me shkrim ka bërë një kërkesë për arrestime. Ajo letër duhet të jetë në arkivin e kryetarit. Sipas Thaçit, mungojnë vetëm emrat e të arrestuarve, por qenkan të 200 tjerëve. Listën kryetari nuk e bën publike. Dëshiron vetëm t’ i besojmë dhe të mos shtrohen shumë pyetje!

Nuk nxirret asnjë dokument jashtë, por lejohet të besohet, se Erdogani bëri puç në Kosovë, se ka urdhëruar ministrinë e punëve të brendshme, ky i fundit bosin e Agjencisë Kombëtare të Inteligjencës dhe ata dy, së bashku, kanë planifikuar dhe urdhëruar sulmin dhe rrëmbimin, si ushtarët e Kalifatit. Puna mbaron dhe shteti i Kosovës administrohet nga diktatori Erdogan.

Edhe pas dy ditëve nuk dihet asgjë me siguri, se si rrodhi, kur u mor urdhri nga Erdogani, ose kur u mor nga Thaçi, kur braktisën Kosovën dhe ku dhe kur aterruan.

Thaçi përpiqet të mbijetojë, Haradinaj nuk ka as vezë, as pushtet politikë ta shqyrtojë çështjen deri në fund. Veseli nuk guxon të përplaset me Thaçin nga mungesa e boleve, dhe ja kemi një situatë, ku bota zgërdhihet me një elitë politike, që dinë gjithçka, por jo kush drejton shtetin! Në çaste vendimtare si ky, një politikan i vërtetë, nuk përkulet, por profilizohet dhe merr përgjegjësi. Ky rast ishte një shans i Ramushit dhe Veselit. Ata nuk patën guxim dhe do të vazhdojnë në larjen dhe shpëlarjen e Thaçit.

Pse nuk bëhet transparente krejt ecuria, nga urdhri i parë, deri te deportimi? Nuk do të bëhet sepse do të shembej koalicioni i brishtë. Se urdhërues është Thaçi, tregon vetburgosja e ministrit dhe shefit të AKI-së. Ata dy kanë një problem të madh. Ata duhet të pohojnë se kidnapuan njerëz pse ju ka tekë, por se urdhër nga Thaçi, nuk kanë marrë.

Ata duhet të gënjejnë publikisht dhe nuk shfaqen as në televizor, sepse rrena mund të thuhet me fjalë, por trurin vështirë të fsheh mimikën, që do të tregonte të vërtetën.

Shkurt e shqip çudia do të harrohet ditën e tretë dhe Thaçi do të vazhdojë me sundimin e tij dhe manipulimin e popullit. Tani duhet pritur reagimin e shteteve të BE-së se a mund t’i anulohen vizat, një shteti, i cili botërisht deklaron, se nuk din kush bëri aktin terrorist në emër të vendit. Nuk është me rëndësi përkatësia etnike e të deportuarve, por shfuqizimi i shtetit dhe veprimet arbitrare!

Shteti i Kosovës dëshmoi një fakt të madh: Dikatatori Erdogan është udhëheqësi jonë!

------------------------


Nëse dëshironi të lexoni më shumë nga Lis Bukuroca, atëherë këtu mund të porosisni: Letër burrave, tregime dhe sprova,  romanin, Ngjyrat e dashurisë  me Kanunin erotik, (vetëm për të rritur) ose përmbledhjen me poezi: Hijedritat e jetës.