Zvicra e Ballkanit

Republika e Re "Zvicra e Ballkanit", së shpejti do të mbajë zgjedhje të lira, të drejta dhe shumë interesante, ku nuk do të vidhet asnjë votë!

Një burim anonim thotë se Hashimi Thaçi dhe Kadri Veseli, kanë ndaluar rreptësisht vjedhjen e votës së qytetarit. Ata paskan arsyetuar në këtë mënyrë: "Nuk do të lejojmë që në Zvicrën e Ballkani të veprohet si në Zvicrën e Alpeve, ku shumë hajdutët respektohen dhe ku kanë deponuar paratë e vjedhura! Në asnjë mënyrë nuk do të lejojmë të dëmtohet imazhi i Republikës së Re, që shkurtimisht dhe zyrtarisht tani e tutje, do të quhet ndryshe!

Pasi curroi ky lajm, opozita u nervozua shumë. Isa Mustafa, Fatmir Limaj, Ramush Haradinaj, Albin Kurti dhe Behxhet Pacolli, u shprehën me një deklaratë me shkrim në facebook, por edhe me një video-lajm, të cilën e vodhi youtube dhe nga klikimet e shumta, u bllokuan për disa orë. Trump urdhëroi të fshihet ai lajm si “fakenews”. Tani dy faqet funksionojnë përsëri.

Opozita e bashkuar rreth flamurit dardan dhe pellazg, doli para gazetarëve dhe tha: "Ne nuk e njohim dhe nuk pranojmë Zvicrën e Ballkanit, madje as nuk na tregojnë si do të quhet saktësisht! Arsyetimi jonë: Mund të vijnë 1 milion auslandera për të punuar te ne dhe na e bëjnë helaç strukturën e kombit kosovar!" Pasojnë nënshkrimet e liderëve të ndritur.

Pasi morën vesh reagimin e opozitës së bashkuar, Thaçi dhe Veseli, mbajtën një konferencë për shtyp, ku u përpoqën ta qetësojnë popullin e shqetësuar se pas zgjedhjeve, duhet të zgjohen të gjithë herët për të shkuar në punë. U shqetësua shumë edhe Zuckerberg.

“I dashur komb atdhetar dhe patriotik! Zonja të bukura dhe zonja të zonja! Zotërinj trima dhe të pathyeshëm të Zvicrës së Ballkanit! Republika e Re do të quhet ZVIBAK, pra duke marrë disa shkronja nga emri i ri i republikës. Nuk do të quhen më kosovarë, por vetëm duke u bazuar në emërtimin e ri të republikës. Gjuhëtarët tanë kanë zgjidhur këtë çështje dhe pasi të fitojmë zgjedhjet e sinqerta dhe të sakta, emërtimi i banorëve do të jetë: 'ZVIBAR' Shkronja nismëtare nga “Zvicra Ballkanike”, por, edhe duke shtuar mbaresën patriotike, atdhetare 'AR', si ari, si simbol i mirëqenies, që do të vijë pasi të numërohen votat e fitores sonë.

Përveç kësaj, panikun që ngre opozita, nuk qëndron. Ne kemi vendosur që punëtorët që vijnë për të punuar te ne, pas fitores tonë madhështore në Zvibak, do të quhen MËRGIPUFIZ, që dmth. “mërgimtarë për punë fizike”, kurse zvibarët, do të punësohen të gjithë vetëm nëpër zyra të Zvibakut. Me një ligj të posaçëm do të ndalojmë që banorët tanë të shumëvuajtur, të merren me punë të rënda. Mijëra mërgipufiza do të punësohen edhe si hamall, që do të barin gjësendet që ju do të blini në pazar, por do të keni edhe nga një shërbëtore në çdo shtëpi, sepse ju duke punuar të gjithë, nuk do të keni kohë të merreni me cikërrima, si përgatitja e darkës, lustrimi i këpucëve apo hekurosja.

Mërgipufizët në fillim do të kenë një leje qëndrimi vetëm për nëntë muaj. Ata që nuk punojnë mirë si ne, zvibarët, do të ekstradohen menjëherë! Do të dëbohen nga Zvibaku edhe ata që korruptohen apo vjedhin shtetin dhe le të thyejnë qafën në Zvicrën e Alpeve, që është shqepur keq me kantone, kurse ne, kemi lejuar vetëm një në veri, me kryeqytet katundin Leposaviq.” Në fund nënshkrimet: Kryetari H. Th dhe K.V. Kryeministër në pritje.

Me të dëgjuar këtë lajm, opozita njëzëri pohoi se nuk do të luajë më politikë dhe nuk do të shfaqet fare në zgjedhje. Madje kundërshtuan edhe shërbëtore në shtëpi duke thënë se mund të rrënojnë bashkëshortësitë e dardanëve. Isa dha dorëheqje dhe kërcënoi me ndërsimin e Lutfi Hazirit. Luta u shfaq vetëm disa sekonda në RTK dhe tha: “ Hashim, mos më nguc se ..., ti e din kush është Luta!”

Gjendja është shumë e tensionuar dhe plot ankth, po pritet mendimi i Rexhep Qosjes për Zvibakun dhe për kombin e ri, zvibarët. 

Sapo përfundova këtë raport, televizioni gjerman njoftoi se Kosova do të quhet ZVIBAK dhe me nxitim, do të krijojnë Republikën e Re, nga frika se ua vjedh Zvicrën e Ballkanit Sali Berisha. Ata në këtë mënyrë duan t'ia hedhin Europës dhe si viceran, të udhëtojnë pa viza dhe të krijojnë kushtetutën e re dhe ushtrinë, sepse Zvibaku nuk ka asnjë detyrim ndaj bashkësisë ndërkombëtare, por vetëm Republika e Kosovës.

U përmendën edhe mendimet e shefave të Ballkanit, ku kishin thënë se me Zvicrën e Ballkanit, shqiptarët synojnë të krijojnë Zvicrën e Madhe! Putini në një telefonat me Trumpin, kërkoi të ushtronte trysni ndaj Thaçit, duke thënë se Kosova nuk ka aq shumë kodra, sa të quhet Zvicra e Ballkani dhe se qëllimi është, të zaptohen kodrat e vendeve përreth, që do të shpinte domosdoshmërish te Zvicra e Madhe e Ballkanit dhe ku do të dominonin zvibarët e rinj, por që në fakt, do të jenë shqiptarët e lashtë: pellazgët!

Shpresohet se profesor doktor Berat Buzhala do të aderojë në ndonjë parti, ose do ta ndreqë një për vete.

Nëse dëshironi të lexoni më shumë nga LB, atëherë mund të porosisni romanin: Ngjyrat e dashurisë, ose përmbledhjen me poezi: Hijedritat e jetës.