Shtrëngata dhe konsultimet me aleatët

1. Emrat e grave dhe shtrëngata

Zakonisht shtrëngatat më të tmerrshme, më shkatërruese pagëzohen me emra të grave si, Katerina, Sabina, tani Irma. Jozefi që nxiton pas saj, duket të jetë më i dobët. Pastaj akuzojnë të rinjtë pse nuk martohen. Cili burrë do të merrte guximin të sjellë në shtëpi një Irmë, që po shkreton çdo vendbanim para vete?!

Madje edhe të martuarit kanë frikë të kthehen në shtëpi me përpikëri. Disa sillen e mbështillen nëpër qytet dhe vonohen qëllimisht për të kaluar sa më pak kohë me Stuhinë e vet. Ndoshta këto emra të grave ndikojnë edhe në rritje te shkurorëzimeve.

Gratë duhet t'i kuptojnë burrat, edhe ato, nuk do të dëshironin një burrë me emrin Hitler për shembull. Mund të ngjallë asociacione traumatizuese natën.

Nëse vazhdohet kështu, burrat të trishtuar nga gratë furtuna, do të martohen vetëm me burra. Nuk di pse një tornado nuk quajtën "VV", një hurrikan "PDK", puhinë “LDK”, kurse “Nisma”, fillimin e murrlanit.

Sa bukur do të tingëllonin hurrikanët me emrin: Ramush, Hashim, Kadri, Albin! 

Për shembull: Shtrëngata Ramush po lëvizë drejt Perëndimit. Luten banorët të mos braktisin shtëpitë, por të struken në vende të sigurta!

Ose, CNN në breaking news: "U ngrit Hashimi! Kësaj shtrëngate me shkreptima e me bubullima, nuk i dihet “Nisma”, e as fundi. Madje edhe Shiroku Ibrahim K., nuk mund të japë sqarime të sakta. Luten qytetarët të braktisin vilajetin e tij pa viza sepse rreziku është i madh të ngulfaten brenda. 

Në një rast tjetër “RTKlive” do të raportonte në këtë mënyrë:” Meteorologët bëjnë të ditur se Shtrëngata Ramush, pas tij  Hurrikani Kadri, vrullshëm dhe shoqëruar me shi janë ngritur mbi Kosovë. Ata lëvizen me shpejtësi gjersa fryn Hashimi, pra Murrlani me erë të stuhishme. Pritet “Puhiza Isë” të merret me qortimin e tyre, kurse Furtuna “VV”, do të sjellë re të reja, të bardha dhe të murrme...

2.

Konsultime me aleatët

Nëse shihni rreshta të gjata me gra para ambasadave në Prishtinë, mos mendoni se janë duke pritur për viza. Jo! Tani në shtator nuk udhëtojnë, por presim për t'u konsultuar me aleatët tanë perëndimorë se si shtihet turshija.

Aty ku mësojnë burrat dashurinë ndaj atdheut, dmth. ku bëjnë kurse të natës mbi politikën si art, tani mbahen për gra mësime plotësuese: “Turshija si art i së mundshmes në një vend shumetnik.”

Për gratë verën e ardhshme do të mbahet kursi: "Flija me saç dhe komunikimi i drejtë me burrin politikan", kurse për burrat do të përsëritet seminari i viteve të kaluara: "Shqipja kos dhe zvarritja progresive si parakusht i karrierës politike." Pas seminarit, më të përkulshmit do të zgjidhen për t'u flijuar për Kosovën në poste të rëndësishme!"