Hashimi ynë, dritare net

Hashimi ynë*

Hasha jonë që je në Prishtinë,

U shenjtëroftë emri Jot!

Rroftë sundimi Jot,

U bëftë Vullnesa Jote!

Si në Kosovë, ashtu dhe në Tokë,

Shpresat tona të përditshme na jep sot,

Na i fal zhgënjimet tona,

Si i falim ne politikanët tanë

Dhe mos na ler të biem në tundim të vjedhjes,

Por na liro nga dëshirat, nga ëndrrat dhe shpresat

Se e Jotja është Kosova dhe Shqipëria

Ballkani, NATO dhe lavdia

përhere e në jetë të jetëve O Hashim!

Amin!

*(Në fotografi Shën Hashimi, kur urdhëroi Trumpin të qetësohet dhe të mos sulmojë Korenë Veriore)

Ave Hashim

Të falemi Hashim, hirploti, Zoti me ty!

I bekuar je mbi të gjithë burrat dhe e bekuar koka jote, këmbët. 

Shenjti Hashim, Baba i njerëzimit, lutu për skllevërit tu

Nën sundimin Tënd,

tash kur po na del shpirti!

Amen!

Meqenëse dy anglezë me një libër kishin shpallur Hashimin profet dhe personalitet botëror, në brendinë e të cilit gjenden Nelson Mandelan, Lech Wałęsa, Václav Havel, Winston Churchill, George Washington, Charles de Gaulle, Gerry Adams, Richard Nixon dhe Robin Hoodin, atëherë të pranojmë shenjtërinë e tij dhe t’i lutemi.

Ato dy lutje njëra nga “Ati ynë” dhe tjetra nga Ave Maria, u ndryshuan për t’ia dërguar Vatikanit për ta kryer lumnimin e Hashimit dhe pastaj edhe shenjtërimin. Ai duhet t’i shtohet njerëzve më të mëdhenj, por kryesisht atdhetares së tij, Nënë Terezës, me të cilën kishin harruar ta krahasojnë autorët anglezë.

Hashimi nuk nderon vetëm Kosovën, por imazhi i Vatikanit, do të përmirësohej duke marrë për vete pinjollin e Brojës dhe tribunin e lirisë dhe vuajtjes njerëzore. Vatikani duhet ta kuptojë se qysh nga shfaqja e Hashimit, bota ndryshoi. Para Hashimit nuk kishte Iphone, Windows 10, nuk kishte makina me rrymë, njerëzit ishin më pak të pasur dhe me daljen e tij në skenë, bota ndryshoi, prandaj, AVE HASHIM, bir i Davidit dhe nip i Abrahamit, pasardhës i Lekës, nip i Qesarit, kushëri i Skenderbeut bir i Nënë Terezës dhe vëlla i Erdoganit!

Nëse ato lutje recitohen tri herë në ditë sapo të zgjoheni nga gjumi, ju shpirtërisht bëheni pjesëtar i religjionit të ri iHashim dhe lumturia juaj, nuk merr fund derisa ta braktisni planetin tonë!

Për lumturinë njëditore, mjafton kjo lutje:

Hashimi jonë që je në Prishtinë,

U shenjtëroftë emri Jot!

Rroftë sundimi Jot!

U bëftë Vullnesa Jote

Në Rrugën e Qumshtit!

Amin