Kërcënimet ruso-serbe për Kosovën janë serioze

Kërcënimet ruso-serbe duhet të merren tekstualisht, edhe pse ato po shqiptohen qetë dhe pa potere të madhe.
Çka mendojnë rusët, sidomos Lavrov dhe Putin kur përsërisin se pavarësia e Kosovës mund të ketë pasoja? Mund të ketë apo do të ketë? Herë supozohet, herë parashikohet.

Sidoqoftë në prapaskenë ata janë përgatitur dhe pas shpalljes së sovranitetit, atëherë do të përmbarohen edhe kërcënimet e tyre. Nuk duket e besueshme se këto kërcënime do të jenë vetëm për ta dokumentuar dështimin e tyre në skenën ndërkombëtare.

Luftërat politike sllave janë gjithmonë misterioze dhe me plot befasi. Çka mund të ndodhë?
Ndarja Kosovës. Kjo tani po shihet.

Serbia ka nisur ndarjen e Kosovës. Zyra e hapur ne veri te Mitrovicës dëshmon këtë. Në ditën e shpalljes së pavarësisë, do të shkëputen edhe serbet. Këtu nuk janë duke lënë dyshime as serbet, as rusët.

Kjo do të bëhet për tri arsye: njëra për ta shpëtuar fytyrën serbe, tjetra për ta shpëtuar fytyrën ruse dhe tere: për t’i ngjitur rusët në skenën ndërkombëtare ku dikur ishin sovjetikët.

Ata ndarjen do ta përligjin me thyerjen e rendit ndërkombëtar. Nëse bëni ju, ashtu dimë edhe ne, i tillë do të jetë arsyetimi.

Edhe pse të gjitha rastet që përmendin rusët dhe serbet, separatizme potenciale, nuk kanë gjë të përbashkët me Kosovën. As historinë, as gjeografinë. Kosova kufizohet me vendin amë, të gjitha vendet tjera separatiste nuk kufizohen me atdheun e tyre. Përjashtim bën këtu Republika Serbe në Bosnjë që është deklaruar për bashkëjetesë me boshnjakët.

Kjo republikë nuk ka ekzistuar kurrë në histori, ajo është avancuar politikisht më shumë se Sanxhaku dhe Vojvodina. Ajo nuk mund të shkëputet, por kërcënimet ruse janë shumë eksplicite për Ballkanin. Dhe, ato, pa ekuivokë, nuk janë të mira.

Pyetja është se a do të mbetet Perëndimi konsekuent apo do të pranojë ndarjen për t’i evituar përplasjet tjera me rusët.

Politikanët kosovar duhet tani të përgatiten dhe të kërkojnë që TMK të ruajë kufirin me Serbi. Duhet të përgatitet edhe Presheva me Bujanocin dhe Medvegjen se rusët janë duke punuar në ndryshimin kufijve në Ballkan.

Ashtu si ka ditur Putin përqindjet e votave para disa muajve, kështu din ai edhe kufijtë e ri ballkanik. Serbët nuk pranojnë këmbime me hyrje në Evropë, sepse ata ashtu ashtu një ditë do të jenë brenda, por problemi është se për ndihmën ruse ata kanë humbur shumë në autonominë e tyre politike dhe ekonomike kryesisht. Rusia nuk ka qenë kurrë në histori vend human, por vetëm shfrytëzues...

Sido që të jetë viti 2012 duhet të na gjejë në një shtet. Këtë nu duhet ta themi me zë të lartë, por nëse jemi kundër bashkimit, atëherë jemi kundër vetes dhe në dobi të të huajve. Ka ardhur koha të mendojmë për veten...


Dhjetor 2007