Zot, edhe një libër

shkruaje edhe një libër të lutem se na hëngër dreqi

(dhe nuk kuptoj pse të duhej djalli

pse të duhej opozita)

shkruaje një libër që na mëson më shumë se Arsitoteli

më shumë se Descartes

më shumë se Galileo

më shumë se Charles Darwini e Albert Einsteini

më shumë se Richard Dawkins e Stephen Hawking

më shumë se Claude Lévi-Strauss e Jürgen Habermas

libër që dëshmon se ti din më shumë se krejt dijetarët e Tokës

shkruaje vet mirëpo

nëse nuk ke letër

skalite në pllaka guri

pa ndihmën e njeriut

ashtu siç dite të krijosh makro dhe mikro universin

glalaktikat dhe qelizat

vet, pa ndihmën e njeriut

një libër që nuk ndanë njerëzit në kope e hordhi

një libër për njerëzimin

dhe shkuli njeriut gjenin e urrejtjes

gjenin e vrasjes

pastaj mirr një vendim dhe gjyko këtu në tokë:

aty ku bëhen padrejtësitë

derisa kanë trup e shpirt gjykoi o zot

jo atje
jo atje

ku nuk kanë formë, lëndë e përmbajtje

shkruaje o burrë i qiellit

se do ta hajë dreqi burrin e dheut, që e bëre nga balta

baltak

e po bëhet llum

na duhet një bashlibër, për bashnjeriun

për njeriun që di shkrim-lexim desha të them o zot

dhe nise kështu librin:

para kaq e kaq viteve, krijova këtë apo atë,

lëndët përbërëse janë këto dhe ato,

unë jetoj këtu apo në këtë galaktikë

në faqen e parë bashkagjiti librit edhe një fotografi

ai libër zot i dashur do të shpëtonte miliona fëmijë nga uria

miliona njerëz nga vdekja dhe mëria

bëje nga dashuria për njeriun e baltës,

në të gjitha gjuhët e botës

sepse balta po ha baltën këtu o zot

e ti hesht e shpërfill burrin e dheut

krijesën tënde

Nga përmbledhja me poezi Hijdedritat e jetës