Lis Bukuroca : Karma në veprim, gazeta Zëri, Sot

Karma dmth. kur e liga që është bërë, kthehet me krejt intensitetin e vet tek keqbërësi. Sipas budizmit, nuk i shpëton askush. Pasoja kthehet në cilësi dhe sasi të njëjtë. E njëjta prodhon të njëjtën:Aksion-Reaksion... Pas luftës u vranë shumë veta, ekzistonin lista, LDK trajtohej si tradhtare dhe sot LDK voton ligjin për themelin e gjykatës për ish drejtuesit e UÇK-së, edhe atë, së bashku me PDK-në patriote. Nuk duhet dyshuar fare se LDK e ka bërë më kënaqësi. LDK, që nga filozofia e Rugovës, i kanë ngelur vetëm tri shkronja.

A po përfundon një epokë, vështirë të thuhet, por një gjë mund të konstatohet qysh tani: ishte një fitore e madhe e Serbisë. Sigurisht edhe e LDK-së. Duke vrapuar për poste, harruan zezonën serbe dhe në vend se të kërkohej dëmshpërblim nga shteti serb, do të procedohen ata sipas dëshirës serbe. Këta që po luftonin për çlirim, akuzuar nga ata që po luftonin për ruajtjen e kolonisë.

Ky shtet dhe ky popull ka derdhur me miliarda euro në ekonominë serbe dhe kështu financonte destabilizimin e vet. Ka blerë dhe ngrënë edhe krunde serbe. Me qeverisjen e Thaçit, Kosovës nuk i kuptohej as drejtim, as rruga. Thaçi qe bërë i shantazhueshëm dhe kjo i kushtoi shumë Kosovës, si në ekonomi, ashtu edhe në imazh. Se me Perëndimin Thaçi nuk mund të tallet, duhet ta ketë kuptuar sot.

Nuk besoj se mund të provohet diçka nga raporti i Martit, por dëmi do të jetë i madh për imazhin, për faktin se do të hetohen edhe për shitje të organeve. Si do që të përfundojë, meritat e tij nuk do të zhduken, por nuk do të harrohen edhe ato që ka mundur të bëjë, është dashur të bëjë dhe nuk e bëri. Në kohën e tij dhe Naim Tërnavës, Kosova u shndërrua në shtet pa ligje, në një anarki, ku kërcënimet bëheshin edhe publikisht, si edhe rekrutimet.

Meqenëse populli i Kosovës nuk kundërshtoi themelimin e gjykatës, atëherë rezulton se qeverisja e Thaçit u ka ardhur në majë të hundës. Përveç lirisë, që i ngjante një anarkie të përkryer, populli i Kosovës me shtetin e vet nuk krenohej, nuk ndjehej mirë, por qe izoluar, ngushtuar, sa nuk i duronte më toka dhe, ia mësyn Perëndimit kolektivisht.

Ashtu si para lufte që përfundoi efektet filozofia e Rugovës, ka disa vite që ka përfunduar edhe e UÇK-së. Kosovës i duhet një parti qytetare. Një parti e re me protagonistë të rinj, edhe atë: as si LDK, as si PDK, as si VV dhe si asnjë parti ekzistuese, sepse ato kanë sjellë popullin në gjendje të mjerë, por vet nuk vuajnë. Duhet një parti me dinjitet dhe integritet. Një parti që adhuron shtetin e vet.

Kosovës i duhet një parti qytetare e padamkosur. Një parti që lufton korrupsionin, krimin, radikalizmin, nepotizmin dhe ndërton shtet ligjor. Një parti që merr kontakte me botën dhe fton investitorë. Një parti që mbron dinjitetin e popullit dhe punon për popullin. Një parti që din ta ndërtojë të tashmen dhe përgatitet për të ardhmen. Jo parti që mbahet në pushtet me meritat e djeshme dhe mosdijen e sotshme.

Të gjitha partitë ekzistuese janë diskredituar. Kosova ka nevojë për brezin e ri, për ata që dinë dhe duan, edhe atë jo nga partitë e vjetra, por nga ata që kanë mësuar se si nuk duhet bërë politika. Këto parti që kemi, duke u përleshur për pushtet, e shndërruan Kosovën në një burg të Europës. Kosova ka njerëz të dijshëm. Ka njerëz me integritet. Ka njerëz që kanë pasion, por ata nuk janë të përfshirë nëpër parti, sepse është bërë turp të jesh anëtar i partive të sotshme, që ndërrojnë orientimin dhe bindjet si laviret mbathjet. Kosova ka vuajtur shumë nga pushtimet. Kosova ka nevojë tani të çlirohet nga zhvatësitë e vet dhe kjo mund të bëhet vetëm me një parti moderne, që kupton kohën, drejtimin dhe është e gatshme të sakrifikohet për demokraci dhe shtetndërtim.

Zëri
Gazeta SOT

LIBRA NGA LIS BUKUROCA TEK AMAZON