Mahsa Amini

meqenëse në emër zotit mund të flasë kushdo

si Kirili rus për shembull

apo si popi serb, që vraponte pas tankeve

për t'i bekuar ato

atëherë vështirë të përligjet ekzistenca e tij

pra meqenëse në emër të tij mund të flasë kushdo

si mulla i Iranit për shembull

apo si Policia e Moralit

që ia mori jetën zonjushës pse i kishte rrëshqitur shamia

atëherë zoti nuk po guxon të ekzistojë

sepse kryezoti njeri ka fuqi më shumë se ai

prandaj po vret e pret i papenguar

i pafrikësuar

Polica e Religjionit

të vret

edhe popi rus të vret

ata ta nxjerrin shpirtin në emër të zotit

E pastaj?

Pastaj popi Kiril thotë:

Nëse vdes duke vrarë ukrainas në shtëpinë e tyre, 

"do të jesh me Zotin në mbretërinë e tij, plot lavdi…"

Tani Mahsa Amini mundet edhe pa shami

nuk i duhet më

tha Polica e Moralit

që ia nxori shpirtin me plot moral mesjete

kurse ushtari rus 

22 vjeçar

si edhe zonjushja së cilës iu panë pakëz flokët

janë mbuluar me dhe dhe do të harrohen

gjersa prindërit e tyre do të luten

ata shpresojnë dhe do të luten

se ndoshta një ditë

zoti do të dënojë popin rus dhe mullën e Persisë…

Aktkauzë IV