Mos voto kurrë këtë politikan!

Mos voto më kurrë atë politikan të votuar nga populli, i cili braktisë zyrën e vet, ku e ka dërguar populli, me një makinë dhe shofer të paguar nga populli, që shkon te një klerik i pa votuar për t' i uruar një feste fetare. Mos e votoni atë sepse ai po zhvleftëson pozitën, degradon pushtetin e besuar nga populli dhe po i nënshtrohet një kleri që nuk propagandon dashurinë në mes njerëzve pa dallim religjioni, race, ngjyre apo kombi.

Mos voto kurrë këtë politikan i cili faktorizon religjionet, sepse Europa ka dëbuar ato nga shteti, si pasojë e mësimit të madh që ka marrë gjatë historisë. Vrasjet shkaktuar nga religjioni, me motivim nga religjioni, nuk di t' i tregojë as historia saktë; kanë ndodhur, po ndodhin dhe do të ndodhin, nëse u jepet hapësirë. Edhe lufta e sotshme mes hebrenjve dhe palestinezëve burim kryesor ka dy ektstremizme fetare, dy urrejtje reciproke. Europa këtë mësim të gjenocideve në mes protestantëve dhe katolikëve e ka paguar me miliona njerëz. Sot kjo luftë po përsëritet në mes fraksioneve muslimane dhe duke i referuar të njëjtin zot, si edhe tek krishterët dikur.

Mos voto kurrë një politikan i cili edhe pse i zgjedhur nga populli, për t' i shërbyer popullit, merret me promocionin e religjioneve. Në Europë politikanët nuk i nënshtrohen klerit, por urimet fetare i bëjnë nga zyra ku i ka veshur populli me pushtet dhe me flamurin e kombit pas shpine.

Mos voto kurrë një politikan i cili gjunjëzohet para njerëzve që kanë studjuar një libër, që thonë se njeriu u krijua nga balta apo dheu, e jo si e dëshmon shkenca me fakte, me mijëra libra se: bazat substanciale të ndërtimit të gjallesave, edhe bimëve janë: proteinat, yndyrat dhe karbohidratet, e jo dheu, siç shkruan në revistën gjermane “Focus.” Vetëm skulptorët ndërtojnë njerëz nga dheu...

Mos voto kurrë atë politikan që merret me faktorizimin dhe ngritjet e klerikëve. Me vizitat që ata u bëjnë prijësve fetar, po i përgatisin nesër për ta marrë pushtetin dhe po shërbejnë si aktorë publiciteti për ta. Ata po u falin atyre besueshmëri dhe pranueshmëri politike.

Mos e voto dhe mos i fal rrëshqitjet. Demokracia përforcohet nga ndryshimi i politikanëve, jo nga ndërtimi i despotizmit. Toleranca fetare rrezikohet sepse religjioni nuk po trajtohet si në Europë si çështje private e njeriut, por po shfaqen tutorë, që nga pagat e tyre, nuk u falin as dhjetë për qind të varfërve, por u marrin duke i mbushur njerëzit me krenari dhe mosdurim ndaj religjionit apo kombit tjetër.

Mos voto ata politikan që përkulen para rregulloreve dhjetëra shekuj të vjetra, por voto atë politikan që përkulet para kushtetutës. Aty janë rregullat dhe përkufizimet si jetohet jeta sot. Nëse dëshiron të jetosh dje, atëherë voto ata politikan dhe prijës fetar, është e drejta jote elementare në demokraci, por imponimi i dhunshëm nuk lejohet në demokraci, sepse ky rend ka edhe rregullat e përkufizuara mirë si të mbrohet nga teokracitë dhe diktaturat. Edhe pse sot tek ne nuk funksionojnë.

Pra mos voto kurrë atë politikan që përziejnë religjionin me politikën, sepse nga kjo përzierje kanë vdekur dhe janë shituar miliona familje. Sikur të ishte e mirë simbioza, do ta bënte këtë edhe Europa. Mos lejo askush të të interpretojë religjionin, ai nuk është shkruar për filozof dhe interpretues, por për popullin që nuk dinte shkrim lexim.

Nëse përcjell rënien dhe ngritjen e politikanëve shqiptarë, atëherë kupton mirë pse kemi pasur aq shumë Qesarë në Perandorinë Romake, pse aq shumë vezirë e guvernatorë në Perandorinë Osmane dhe pse edhe sot kemi ambasador shqiptar të Kosovës akredituar në Çeki nga Serbia.

Nëse nuk ka politikan që meriton të votohet, atëherë mos voto fare, kështu ndihmon në krijimin e partive të reja, që merren me problemet e jetës dhe me lumturinë e njerëzve derisa të jenë gjallë. Asnjë religjion nuk është universal. Vlerë universale është vetëm ajo që pranohet dhe besohet nga të gjithë popujt e kësaj toke: që është i mirë dhe i pranueshëm për të gjithë. Religjionet e sotshme janë vlera fragmentare dhe me përkrahje të kufizuar...